Kognitiv terapi, trinn 1 og 2

Kurs

Ønskjer du å formalisere utdanninga di i kognitiv terapi? No kan du ta eksamen både i trinn 1 og 2 hjå Høgskulen i Sogn og Fjordane.

Studieinnhald

HiSF samarbeider med Norsk forening for kognitiv terapi (NFKT) om studium i kognitiv terapi. Etter at du har gjennomført kurs og motteke kursbevis hjå NFKT, kan du melde deg opp til eksamen hjå HiSF.

Behandling med kognitiv terapi siktar mot å gje pasienten kunnskap om si eiga liding og innsikt i samanhengen mellom tenking, åtferd og følelsar. Studiet er sett saman av to emne med avsluttande eksamen for kvart emne.

• Trinn 1 gjev ei teoretisk innføring i kognitiv teori og praktiske, terapeutiske ferdigheiter, spesielt i forhold til depresjonar og ulike angstlidingar.
• Trinn 2 inneheld ei djupare teoretisk forankring i terapeutiske ferdigheiter. Fokus er retta mot å knyte saman dei ulike nivå av dei terapeutiske kompetanseområda, etablere ein terapeutisk allianse og tilpasse behandlinga til den enkelte pasienten sine behov.

Du finn meir informasjon om studiet i studieplanen for 2011-12.

Undervisningsmåtar

Studiet inneheld undervisning, praktisk øving på kognitiv åtferdsterapi, rettleiing, kliniske demonstrasjonar og framlegg av studiearbeid. Rettleiinga i studiet føregår i smågrupper og i plenum.

Kvar student skal gjennomføre eit videoopptak av sine eigne terapiar/øvingar og få tilbakemelding på utøvd terapi. Det er forventa at ein brukar forskingsbasert kunnskap i kognitiv terapi for å kvalitetssikre tenestetilbodet til klientar.

Studiet vert arrangert som deltidsstudium av NFKT ulike stader i landet.

Eksamen

Det vert arrangert heimeeksamen for trinn 1 i april og oktober. For trinn 2 er det heimeeksamen i november.

» Påmelding og informasjon om eksamen

Sist endra: 05. mars 2012