– Jeg synes økonomi er et fascinerende fag. Jeg har på mange måter fått det inn fra jeg var liten. Samtalene rundt middagsbordet handlet mye om næringsliv og økonomi. Jeg er svært fornøyd med foreleserne, og læringsmiljøet er veldig bra. Jeg kjente mange som fortalte fine ting om studentmiljøet her oppe, og alt innfridde. Det tok av fra første stund!
Tobias Otnes Brattebø

Økonomi og administrasjon

Bachelor

Ønskjer du å arbeide med oppgåver innanfor økonomi, administrasjon eller leiing? Med bachelor i økonomi og administrasjon får du ei yrkesretta utdanning som opnar for mange moglegheiter innan både privat næringsliv og offentleg forvaltning.

Studieinnhald

Studiet gir deg ein brei økonomisk-administrativ kompetanse og er sett saman av emne frå dei økonomiske og administrative fagområda.

Gjennom studiet lærer du om

• økonomistyring, rekneskap og analyse
• leiing og strategi, med fokus på leiarrolla
• marknadsføring
• samfunnsøkonomi
• forretningsjus

I tillegg har du valfag innan økonomi og administrasjon. I siste studieår skriv du bacheloroppgåve. Du kan også velje å ha praksis, og skrive ei praksisbasert oppgåve.

Det blir arrangert valfritt forkurs i matematikk ved studiestart.

Du finn meir informasjon om studiet i studieplanen for 2012-13.

Dersom du har teke årsstudium i bedriftsøkonomi ved HiSF kan du søkje opptak direkte til andre studieår.

Undervisningsmåtar

Undervisninga vekslar mellom forelesingar, seminar, gruppeøvingar og organiserte kollokviegrupper med rettleiing. Du lærer å arbeide sjølvstendig gjennom individuelt arbeid og gruppearbeid.

Teori og praksis blir knytt saman gjennom arbeid med aktuelle og relevante problemstillingar.

Studieopphald i utlandet

I andre studieår kan du ha eit studieopphald i utlandet.

Yrke og vidare studium

Du kan jobbe med ulike rådgjevings- og spesialistoppgåver knytt til økonomi og administrasjon innan privat næringsliv, offentleg sektor og andre organisasjonar. Du kan også arbeide som mellomleiar og leiar i privat og offentleg sektor.

Ved å velje valemna forvaltningsrett, skatte- og avgiftsrett 1 og 2 samt rekneskapsorganisasjon og årsrekneskap og skrive bacheloroppgåve innanfor relevant fagområde, kan du etter to års relevant praksis søkje Finanstilsynet om autorisasjon som rekneskapsførar.

Med fullført bachelorgrad i økonomi og administrasjon er du kvalifisert til å søkje opptak til ulike masterstudium i inn- og utland. Dersom du ønskjer å søkje opptak til masterstudium ved Norges Handelshøyskole, må eit av valemna dine vere offentleg økonomi.

Sist endra: 17. april 2012