- Det er et lite, men veldig kompetent fagmiljø her på høgskolen. Vi får tett og god veiledning. Det blir undervist i blokker, så vi jobber med ett og ett fag. Det er veldig intensivt mens det står på, men det gjør at man får satt seg grundig inn i hvert enkelt fag. Det er også en fordel at eksamenene blir fordelt utover året. Det fine med å studere geologi i Sogndal, er at vi har storslagne landskapsformer rett utenfor klasserommet!
Erik Brenne

Geologi og geofare

Bachelor

Er du opptatt av klimaendringar og naturkatastrofer? Med eit meir ekstremt klima aukar skred- og flomaktiviteten, og det vil bli eit aukande behov for kompetanse knytta til skred, flom, tsunami og andre geofarer. Bachelor i geologi og geofare er eit geologistudium i nærkontakt med geologien i området rundt Sogndal.

Studieinnhald

Emna i studiet blir underviste i blokk, det vil seie at vi konsentrerer oss om eit emne over 6-7 veker, før vi byrjar på neste emne. Etter kvart emne er det avsluttande eksamen.

I studiet lærer du om

• geologiske prosessar
• geofarer (skred, flom, tsunami, jordskjelv og klimaendringar)
• geologiske ressursar som mineral, vatn og olje
• å lage geologiske kart (skredfare, jordartar og strukturar i fjell)

Du finn meir informasjon om studiet i studieplanen for 2011-12.

Undervisningsmåtar

Undervisninga er basert på forelesingar, seminar, øvingar og gruppearbeid. Du arbeider både sjølvstendig og i samarbeid med andre. Det blir også lagt opp til at du skal formidle fagstoff munnleg og skriftleg.

I mange emne er det obligatoriske ekskursjonar og feltarbeid.

Nokre av emna er lagt til rette for internasjonale studentar og blir underviste på engelsk.

Studieopphald i utlandet

I femte semester kan du ha eit studieopphald i utlandet.

Yrke og vidare studium

Plan- og bygningslova set krav til kommunane om å gjennomføre risiko- og sårbarheitsanalyser før areal blir utnytta til for eksempel veg eller bustader. I samfunnet er det difor aukande behov for kompetanse knytt til kartlegging, vurdering og overvaking av geofarer. Ein bachelor i geologi og geofare gir deg solid kompetanse for jobbar innan miljøsektoren, teknisk etat i kommunar og konsulentfirma.

Med aukande oljeverksemd på djupare vatn og i havområde med høg jordskjelvaktivitet der tsunamiar og undersjøiske skred kan vere ein trussel, vil du vere ettertrakta også i petroleumsindustrien.

Med ein bachelor i geologi og geofare kan du søkje opptak på masterstudium ved høgskular og universitet i inn- og utland.

Sist endra: 17. april 2012