Samarbeid, forsking og formidling

FoU-miljøet i Sogn og Fjordane er i front på forsking og utdanning innanfor fornybar energi, spesielt samfunnsdelen av faget. Prosjektet ” Fornybar energi, innovasjon og regional utvikling”, er eit steg vidare i same retning.

Samarbeidsprosjektet mellom HiSF, Vestlandsforsking og Kunnskapsparken i Sogn og Fjordane, er ei utviding av dagens faglege profil. Det 4-årige prosjektet tek også føre seg marknadsføring, industriell økonomi, finans, entreprenørskap og innovasjon. Kontakten med næringslivet skal styrkast og utveksling av kunnskap og behov blir viktig i prosjektet.

Å etablere nye og utvikle av eksisterande bedrifter der fornybar energi blir produsert og framført er eit langsiktig mål. Det same er kunnskap om korleis lokal- og regionalmiljøet kan skape nye verdiar i og rundt produksjon og bruk av fornybar energi. INU FSF, internkommunal næringsretta utviklingsordning for Førde, Sogndal og Florø, finansierer prosjektet, saman med aktørane.

Fornybar energi, innovasjon og regional utvikling

Prosjektet har som overordna mål å fremje kunnskap som kan styrke lokale og regionale næringsmiljø og innovasjonssystem i fylket. Prosjektet er, som nemnt tidlegare, eit samarbeid mellom HiSF og Vestlandsforsking. Prosjektet skal også gje ny kunnskap for samspelet kompetanse/næringsvirksomheit og fornybar energi, og skal formidle kunnskap på tvers av FoU-miljø og næringslivet.

Kunnskapsparken har i samband med dette prosjektet eit særleg ansvar for å formidle problemstillingar frå næringslivet til FoU-miljøet. Dei skal også syte for at forskingsbasert kunnskap går den andre vegen. Gjennom samarbeidet skal næringslivet og FoU-miljøet knytast tettare saman. Eit resultat av prosjektet vil difor ikkje berre innebere fagleg styrking og ny kunnskap innan forskingsmiljøet, men skal også komme regionalt næringsliv til gode.

Formidling, kunnskapsgenerering og kompetanseheving

Det fire-årige prosjektet omfattar mellom anna to stipendiat, ei professor II-stilling, utgreiing om eventuell oppretting av eit masterstudium, samt tilsetjing av sommarvikarar/studentar. Denne sommaren har Gjert H. Rosenlund, sivilingeniørstudent innan Energi og Miljø på NTNU, hatt sommarjobb knytt til prosjektet. Han har utarbeida eit internt arbeidsnotat med tittelen “Linjenettet i Sogn og Fjordane – status og utvikling.”

Notatet gjev eit godt grunnlag for forståing av no-situasjon og utfordringar knytt til det elektriske linjenettet i fylket. Dette er eit godt døme på korleis prosjektet skal bygge opp auka forståing av fornybar energi, innovasjon og regional utvikling. Ved å samarbeide med ulike institusjonar, organisasjonar og bedrifter, skal den auka kunnskapen nå ut til fleire, og ikkje berre isolere seg til FoU-miljøet.

.

Sist endra: 02. august 2011 12:34:42