Lokalhistorisk samling er overført til Sogndal kommune

Signe Witsøe, Sogndal folkebibliotek, Terje Bjelle, høgskulen, Inger Pedersen, Sogndal kommune og bibliotekleiar ved HSF Astrid Sandnes markerte overdraginga av det lokalhistoriske materialet til Sogndal kommune.

I tjue år har det vore samarbeidd mellom Sogndal kommune ved Sogndal bibliotek, HSF-bibioteket og historikarmiljøet ved høgskulen om arkivering og bruk av lokalhistorisk kjeldemateriale. Samlokaliseringa i kulturhuset la godt til rette for dette, og i ei årrekkje hadde HSF eit særs populært studium i lokalhistorie. På den tida var samarbeidet på det mest aktive. Ei rekkje personar frå heile fylket har teke lokalhistorie ved DH-skulen i Sogndal.

Endra status for lokalhistoriefaget i HSF etter tjue år

Forholda har no endra seg. Høgskulebiblioteket skal i 2012 flytte ut av Kulturhuset og bli samla med resten av høgskulebiblioteket i det nye sentralbygget på Fosshaugane. Faget lokalhistorie har endra status. Det har vorte integrert i bachelorstudiet i historie og eksisterer ikkje lenger som eit sjølvstendig deltidsstudium slik det gjorde tidlegare og samla mange vaksne studentar til undervisnings laurdagane.

Lokalhistorisk kompetanse ved Sogndal bibliotek

HSF ønskjer derfor å overdra mesteparten av det HSF eig i den felles lokalhistoriske samlinga ved folkebiblioteket, til Sogndal bibliotek/ Sogndal kommune. Noko materiale av spesiell forskingsmessig verdi kan det vera aktuelt å flytte med til det nye HSF-biblioteket. Den spesialkompetansen bibliotekarane ved Sogndal bibliotek har, gjer samlinga ekstra verdifull.

HSF takkar for godt samarbeid

Denne avgjerda vart markert ved ei lita samling i slutten av april. Høgskulen takka for godt samarbeid gjennom mange år.

Sist endra: 09. mai 2011 10:43:47