Kvalitetssystemet - kort innføring

Kvalitetssystemet skal sikre god kvalitet på undervisning og forsking.

Nøkkelroller i kvalitetsarbeidet

Student
Det vert forventa at alle studentar bidreg til utvikling av eige studium gjennom aktiv deltaking i dei formelle organa som studentane har til rådvelde t.d. fagutval/klassemøte og ved å delta i emneevaluering og andre undersøkingar av studiekvalitet og læringsmiljø.

Fagtilsett
Dei fagtilsette er ansvarleg for undervisning, forsking og utviklingsarbeid. Dei skal halde seg fagleg oppdatert og bidra til høg kvalitet gjennom aktiv deltaking i evaluering, rapportering og oppfølging slik det er beskrive i kvalitetssystemet.

Instituttleiar
Instituttleiar er ansvarleg for studieplanar, undervisning, evaluering, rapportering og oppfølging for studia på instituttet. Instituttleiar utarbeider rapport om utdanningskvalitet for sine studium. Instituttleiar samarbeider tett med faglærarane på sine studium og rapporterer til dekan.

Dekan
Dekan er fagleg og administrativ leiar for ei avdeling og dermed ansvarleg for at tiltaka i kvalitetssystemet vert sett i verk på si avdeling. Dekan samarbeider tett med instituttleiarane og rapporterer til rektor.

Styre, råd og utval og deira oppgåver i kvalitetsarbeidet

Fagutval/klassemøte
Avdelinga avgjer sjølv om det skal opprettast fagutval elle anna forum for vurdering under vegs i emna.

Studienemnd
Alle bachelor- og masterstudium skal ha ei studienemnd som rådgjevande organ for instituttleiar. Studienemnda skal bidra til å sikre kvalitet og utvikling i studiet over tid. I tillegg til studentar og lærarar skal det vere med ein eller fleire eksterne personar.

Utdanningsutvalet
Utdanningsutvalet har hovudansvar for høgskulen sitt arbeid med kvalitet i utdanningane. Utvalet skal bidra til å utvikle sjølve kvalitetssystemet i tillegg til å arbeide med fag- og studiesaker. Utvalet som vert oppnemnt av styret, består av studentar, faglærarar og ein ekstern. Utdanningsutvalet si heimeside

Læringsmiljøutvalet
Læringsmiljøutvalet er lovpålagt og skal sjå til at høgskulen oppfyller krava til eit forsvarleg læringsmiljø fysisk og psykisk. Læringsmiljøutvalet si heimeside.

Fou-utvalet
Fou-utvalet si overordna oppgåve er å styrkje, stimulere og utvikle HSF si samla fou-verksemd. Dette inkluderer å sjå til at undervisninga ved høgskulen i størst mogleg grad er forskingsbasert. Fou-utvalet si heimeside.

Arbeidsmiljøutvalet
Utvalet har ansvar for at dei tilsette har eit forsvarleg arbeidsmiljø og arbeider med helse- miljø og sikkerheit i høgskulen. Arbeidsmiljøutvalet si heimeside.

HiSF-styret
HiSF har eit lovpålagt styre med til saman elleve representanar. Styret er sett saman av eksterne, studentar og tilsette. Styreleiaren er ekstern. Styret er høgskulen sitt øvste organ. HiSF-styret si heimeside.

Avdelingsråd
Alle avdelingane har avdelingsråd som er sett saman av tilsette, studentar og eksterne medlemar og er eit rådgjevande organ for dekan.

Studentparlamentet
Parlamentet er lovpålagt og er sett saman av studentar frå alle avdelingane. Arbeidet vert leia av eit styre valt for eitt år om gongen. Parlamentet har m.a. som oppgåve å oppnemne studentrepresentantar til høgskulen sine råd og utval. Studentparlamentet si heimeside.

Mottak av nye studentar

Fadderordning
Studentsamfunna i Sogndal og Førde har ansvar for fadderordningane. Dei første vekene blir studentane tatt med på omvisningar, får nyttige råd og tips om studiekvardagen og blir inviterte med på ulike arrangement.

Mottak av nye studentar
Høgskulen har eit mottaksprogram for nye studentar med opplæring i studieteknikk, it- og bibliotekkunnskap.

Utdanningssamtale
Ved studium på 60 poeng og meir får studentane tilbod om ein utdanningssamtale. Denne vert gjennomført individuelt eller i gruppe saman med faglærar. Samtalen skal hjelpe studenten til å klargjere faglege mål og legge til rette for god kontakt mellom faglærar og student.

Utdanningsplan
Alle studentar ved HiSF som skal ta studium på 60 studiepoeng eller meir, må godkjenne ein individuell utdanningsplan. Studentane godkjenner utdanningsplanen sin for kvart semester og blir automatisk meldt opp til eksamen i samsvar med utdanningsplanen.

Tiltak under vegs – evaluering og tilbakemelding

Fagutvalsarbeid – evaluering under vegs
Fagutval eller klassemøte er forum for evaluering og tilbakemelding under vegs i studiet. Det som kjem fram, vert nytta til å utvikle innhald og læringsformer. Fagutvalet/klassemøtet sitt arbeid skal summerast opp i ein kort rapport som faglærar formidlar vidare til studieleiar.

Emneevaluering
Det vert gjennomført evaluering av alle fag/emne med utgangspunkt i eit standard evalueringsskjema. Det er instituttleiar som har ansvar for evalueringane. I praksis vert det faglærarane sitt ansvar å gjennomføre dei. Resultata frå emneevalueringane skal gjerast kjende for studentane, for instituttleiar og for dekan.

Programevaluering
Ved avslutning av fleirårige studium vert det gjennomført ei samla evaluering. Programevalueringane kan ha ulik form. Instituttleiar har ansvar for å utvikle og gjennomføre evalueringa og legge resultata fram for studienemnd og dekan.

Evaluering av praksis
Instituttleiar har ansvar for å planlegge og gjennomføre systematisk studentevaluering av kvar praksisperiode i profesjonsstudia. Praksisstaden skal trekkast med i evalueringsarbeidet.

Faglærar si vurdering
Instituttleiar får systematiske tilbakemeldingar og vurderingar frå faglærarane knytt til emneevalueringane.

Sensorrapport
Eksterne sensorar skal vurdere kvaliteten på eksamensoppgåver, vurderingsordningar og kandidatane sitt faglege nivå. Sensorrapportane skal gjerast kjende for instituttleiar og dekan på avdelinga.

Evaluering av studiekvalitet og læringsmiljø
HiSF gjennomfører ei undersøking av studiekvalitet og læringsmiljø kvart tredje år. Undersøkinga skal legge vekt på å få fram studentane sine vurderingar av læringsmiljø og studentsosiale forhold. Læringsmiljøutvalet har ansvar for undersøkinga. Resultata skal gjerast kjend for studentorganisasjonane, Studentsamskipnaden i Sogn og Fjordane (SISOF) og dei tilsette i høgskulen

Kandidatundersøking
Dei uteksaminerte kandidatane vert i desember bedne om å vurdere innhald og organisering i utdanninga dei har fullført, og utdanninga sin relevans for yrke eller vidare studium. Utdanningsutvalet har ansvar for undersøkinga. Resultata vert lagt fram for studentar, instituttleiarar og dekanar.

Rapportering

Instituttleiar sin rapport om studiekvalitet til dekan (oktober)
Instituttleiar lagar ein årleg rapport om utdanningskvaliteten på sine studieprogram på grunnlag av evalueringar under vegs.Instiuttleiar legg rapporten fram for studienemnda til drøfting. Rapporten inngår i grunnlaget for avdelinga sin rapport om utdanningskvalitet.

Avdelinga sin rapport om studiekvalitet til institusjonsleiinga (november)
Dekan samordnar instituttleiarane sine rapportar og lager ein samla rapport om utdanningskvalitet for avdelinga. Rapporten går inn som grunnlag for HSF sin rapport om utdanningskvalitet til styret.

Institusjonen sin rapport om studiekvalitet til styret (desember)
Dette er høgskulen sitt hovuddokument om utdanningskvalitet. Rapporten er basert på studieåret og skal ligge føre innan utgangen av november kvart år.

Oppfølging - årlege tiltak

Revisjon av studie-og emneplanar
Dette vert gjort på grunnlag av evalueringar og instituttleiar sin rapport om utdanningskvalitet. Instituttleiar har ansvar for arbeidet.

Korrigering av undervisingopplegg
Dette vert gjort på grunnlag av evalueringar under vegs. Faglærarar er ansvarleg.

Institusjonen sin handlingsplan
Institusjonen lagar ein årleg handlingsplan for utdanningskvalitet som oppfølging av Rapport om utdanningskvalitet.

Her er ein breiare omtale av kvalitetssystemet

I Kvalitetshandboka finn du rutinene for dei ulike aktivitetane.

Sist endra: 29. september 2011 09:34:48