Fagkonferanse i økologi på Kaupanger

Stein Joar Hegland er ansvarleg for fagkonferansen i pollineringsøkologi på Kaupanger

Det er miljøet rundt professor Ørjan Totland på Institutt for Naturforvaltning ved Universitetet for miljø- og biovitenskap som står for arrangementet. Postdoktor Stein Joar Hegland er hovudansvarleg for SCAPE 2008. Hegland er innfødd "kauping". For tida er han gjesteforskar ved HSF, knytt til fagmiljøet i landskapsøkologi.

Knut Rydgren, Inger Auestad og Liv Norunn Hamre frå vårt fagmiljø i landskapsøkologi vil delta på konferansen. Førstnemnde skal presentere arbeidet ’Population growth rate in the clonal moss Hylocomium splendens as a function of sporophyte frequency and sex ratio’.

Det blir elles foredrag om alt frå effektar av klimaoppvarming på blomstringstidpunkt og interaksjonar mellom plantar og pollinatorar (t.d. ’mismatches’), via påverknader frå invaderande artar på plantar og pollinatorar, til meir grunnleggjande spørsmålstillingar rundt t.d. kva faktorar som styrer pollenbegrensing og pollineringssuksess hjå plantar.

Om lag 50 forskarar frå 13 ulike land møtast til fagleg og sosiale interaksjonar på Vesterland i Kaupanger. Årets konferanse er den 22. i rekkja. Arrangementet går på rundgang mellom Sverige, Danmark, Finland og Noreg.

Meir informasjon finn du på heimesida til konferansen.

Sist endra: 10. oktober 2008 09:36:07