HSF med i fylkesdekkande prosjekt om Digitalt skulesamarbeid

Grete Netteland er glad for at prosjektet Digitalt skulesamarbeid kjem i gang.

Fylkesmannen har løyvd 2.4 millionar til første fase i det toårige prosjektet, som har eit totalbudsjett på 9,5 millionar.

Hovudmålet med prosjektet er at skuleverket i Sogn og Fjordane skal kunne oppfylle grunnleggjande og pålagde krav om tilgang til IT i undervisninga samstundes som det skal stimulere til at fylket kjem i fremste rekkje i bruk av IT i alle skuleslag.

Det er IT-Forum sitt skulenettverk som skal ha hovudansvaret for prosjektet. Det er også dette nettverket som i stor grad har arbeidd fram prosjektet. I tillegg til HSF består IT-forum sitt skulenettverk av representantar frå Fylkesmannen, Sogn og Fjordane Fylkeskommune og regionråda i fylket.

I HSF vert det lagt opp til eit tett samarbeid internt mellom fagmiljøet i informasjonsbehandling ved Avdeling for økonomi og språk og lærarutdanninga for å skape eit så gjennomarbeidd og vellukka prosjektet som mogleg. Aktuelle delprosjekt som HSF er ansvarleg for er t.d. utvikling av nynorske digitale læringsressursar, digitalt samarbeid mellom lærarutdanning og praksisskular, utvikling av nettbasert undervisning og utprøving av nye vevbaserte læringsteknologiar.

Prosjektet vil også arbeide med å etablere infrastruktur for elektroniske læringssystem i dei svakast utbygde kommunane, utvikle og etablere ei samling av gode døme på digitale læringsressursar tilpassa skulane og sikre brei kompetanseheving og mobilisering av brukarar over heile fylket, både lærarar, elevar, foreldre og lærarstudentar som skal ut i praksis.

Prosjektet er unikt i nasjonal samanheng ved at både grunnskule, vidaregåande skule og høgskule er involverte, seier Grete Netteland. Ho er fagtilsett ved informasjonsbehandlingsstudiet ved HSF og har vore høgskulen sin representant i IT-forum sitt skulenettverk dei siste åra.

Prosjektet vil kunne gje rom for forskingsprosjekt og utviklingsretta arbeid innan både informasjonsbehandling og lærarutdanning og samstundes opne opp for interessante studentarbeid, seier Grete Netteland.

- Prosjektet vil også vere viktig for masterutdanninga innafor Lærarutdanninga ved at ein kan få høve til utvida elektronisk samhandling med både grunnskule og vidaregåande skule.

Fagmiljøet innan informasjonsbehandling ved HSF er i ferd med å utvikle eit meir formalisert samarbeid med både Vestlandsforsking og Sogn og Fjordane fylkeskommune. Dette prosjektet vil bidra til å gje ytterlegare kraft til dette samarbeidet.

Mange håpar i tillegg på at denne satsinga også kan gje utteljing i form av ei stipendiatstilling.

Sist endra: 30. oktober 2007 09:11:31