Anne Grethe Halding disputerer

Anne Grethe Halding.

Med avhandlinga "Everyday life and rehabilitation in COPD - a qualitative study of patients´experiences" disputerer høgskulelektor ved Avdeling for helsefag, Anne Grethe Halding fredag 10. juni klokka 10.15. Det vert prøveforelesing torsdag 9. juni klokka 16. Både prøveforelesinga og disputasen finn stad i auditorium 1 (grønt) ved Oslo Universitetsykehus HF, Rikshospitalet Sognsvannveien 20.

Pasienterfaringar med KOLS

Pasientar som lever med kronisk obstruktiv lungesjukdom (KOLS) kan kjenne seg isolerte og svært aleine om å meistre sjukdomen i kvardagen. Som berarar av ein tobakksrelatert sjukdom opplever dei og tilleggspåkjenningar som stigmatisering og sjølvbebreiding. I motsetnad til dette kan deltaking i lungerehabilitering gi sosial støtte og integrasjon med andre pasientar og helsepersonell, nye muligheter for eigenomsorg og håp om å kunne bevare helse på trass av alvorleg sjukdom. Dette er hovudfunna i avhandlinga som utforskar pasientane sitt perspektiv på kvardag og lungerehabilitering. Funna har implikasjonar for rehabiliteringspraksis og tobakksførebyggande arbeid.

Heile kunngjeringa kan du lese på Universitetet i Oslo sin nettstad.

Pasienten sit inne med kunnskap

- Dette forskingsarbeidet har styrka mi tidlegare oppfatning av at pasientar med langvarig sjukdom sjølve sit inne med kunnskap som er heilt nødvendig for planlegging og gjennomføring av helsetenester. Målet med arbeidet er at slike erfaringar i enno større grad skal bli teke med som ein del av kunnskapsgrunnlaget for helsetenester til denne pasientgruppa. Det har vore svært lærerikt, spennande og utfordrande å utforske pasientane sitt perspektiv seier Halding.

Eit privilegium å vere stipendiat ved HSF

- Eg har vore heldig, for eg har fått støtte til forskinga frå Helse Vest, Helse Førde og Høgskulen i Sogn og Fjordane. Eg har hatt gode medarbeidarar både i det kliniske feltet og i det akademiske miljøet. Det er eit privilegium å få lov til å vere stipendiat ved høgskulen og lære seg å forske på eige fagfelt i godt vaksen alder. Avdeling for helsefag har vore ein god stad å vere stipendiat på. Takk til leiarar, kollegaer og studentar for interesse, faglege innspel og oppmuntrande og sjenerøs støtte, avsluttar Halding.

Halding er opprinnelig frå Oslo, men er vaksen opp i Balestrand og har budd i Førde sidan 1979. Ho var med å starte opp intensivavdelinga ved Førde sentralsjukehus og seinare var ho med å starte opp sjukehusintern vidareutdanning i anestesi, operasjon og intensivsjukepleie i fylket. Ho har vore tilsett i HSF sidan 1996. Grunnutdanninga i sjukepleie har ho frå Høgskolen i Akershus, medan ho har tatt PPU-utdanning og vidareutdanningar i helse- og sosialadministrasjon og rettleiing som leiingsverkty ved HSF. Ho er no den tredje ved Avdeling for helsefag som disputerer for Ph.D-graden.

Frå komitevurderinga

Avhandlinga bygger på ei artikkelsamling, der to av artiklane er publiserte i internasjonale refereebetømte tidsskrift, og den tredje er godkjent for publisering. Ein einstemmig komite har vurdert avhandlinga verdig til å forsvares for doktorgraden. Her er eit utdrag frå komitevurderinga: " Avhandlingen dreier seg om en stor pasientgruppe som erfarer betydelige problem i hverdagen (...) Styrken ved det valgte design er at det i høy grad belyser pasientens eget perspektiv på livet med KOLS og den rehabiliteringen som de har gjennomgått. Dette er i seg selv verdifullt, fordi denne type innsikt er en hjørnesten i utviklingen av virkningsfulle rehabiliteringsprogrammer (...) Et særlig poeng er den stigmatisering som gruppen ofte opplever. Alt i alt gir Halding sin avhandling innsikt i muligheter som foreligger for mennesker som lider av KOLS til å utvikle helsebringende strategier i hverdagen. Resultatene i avhandlingen tilsier at det er et potensial for forbedring av tilbudet til denne gruppen (...) Avhandlingen bringer nyansert og viktig kunnskap på feltet."

Sist endra: 01. juni 2011 15:11:19