Olje- og energiministeren besøkte høgskulen (Sjå TV)

Åse Løkeland overrekk blomar og bok til Terje-Riis Johansen og Agnar Aas.

Markeringa gjekk føre seg i høgskulen sine lokale på Vie og inngjekk i programmet for det nasjonale skredseminaret som fann stad same dag. Vassdrags- og energidirektør Agnar Aas var også til stades ved markeringa. Sjå tv-innslag frå skredseminaret i programmet Sveip på NRK 2, 11. mai.

Naturleg med regionkontor i Førde

Noregs vassdrags og energidirektorat (NVE) og Olje- og Energidepartementet markerte at Regjeringa frå 1. januar 2009 har gjeve NVE hovudansvar for statleg førebygging av skredulukker i Noreg. I den samanhengen skal det og etablerast ei eining for forsking- og formidling ved NVEs regionkontor i Førde.

- Det er store skredutfordringer på vestlandet og med nærleiken til andre forskings- og kunnskapsmiljø var det naturleg at NVE sitt regionkontor ligg i Førde. At Høgskulen i Sogn og Fjordane har ambisjonar om å styrke sine studium innan geofag og skredforsking forsterkar dette, sa Riis-Johansen.

Rektor ved Høgskulen i Sogn og Fjordane, Åse Løkeland, takka Riis-Johansen og Aas ved å overrekke blomar og boka "Til fjells". Ordførar Nils Gjerland takka med diktlesing og blomar.

Førebygging av skredulukker aktuelt i store delar av landet

Skred frå bratte dalsider og leirområde er eit aktuelt problem i store delar av landet. Det store spørsmålet, som også var hovudtema for seminaret, er korleis ein kan registrere og overvake ustabile fjellparti og skråningar slik at ein blir i stand til å varsle skreda, og unngå tap av menneskeliv.

Føremålet med seminaret var å informere om kva problemstillingar forskings- og utdanningsmiljø i Noreg arbeider med på skred, og på kva for område det vil vere viktig med auka forskingsinnsats. Det var eit samla utdannings- og forskingsmiljø på fagfeltet i Noreg som stod bak dette nasjonale skredseminaret.

Tekst og foto: Bjørn Leirdal - bjorn.leirdal@hisf.no

Sist endra: 12. mai 2009 11:51:14